NetSam lea áibbas ođđa namma maid erenoamážit sámi oahpaheaddjit berrejit dovdagoahtit. Dat lea Sámi oahpahusa fierpmádaga ođđa namma, mii maiddái adno dán min neahttasiiddus. 

Sámi oahpahusa fierpmádahkii leat jagis gártan 80 miellahtu. Fierpmádat álggahii diibmá nammagilvvu masa bohte 23 nammaevttohusa. Daid gaskkas leat válljen NetSam nama. Dán evttohusa lea Ande Trosten evttohan, ja nu son fiškala lohkanbreahta vuoitun.

– Lei váttis mearridit nama, go ledje máŋga beali maid galggai váldit vuhtii nama válljedettiin. Váldo gaibadus lei ahte namma galgá doaibmat buot golmma sámegillii mat mis leat fierpmádagas ja ahte lea álkes namma.
NetSam namma heive min mielas bures go galgá adnot buot sámi guovlluin. Namma lea oanehaš, ja go vel čuovvu nama čilgehus buot golmma sámegielaide, de doaibmá dát namma bures, lohká fierpmádaga jođiheaddji Inger Anne Gaup.
Ođđa namma lea juo anus fierpmádaga ođđa neahttasiiddus: www.netsam.org. Dat siidu galgá doaibmat gulahallan gaskaoapmin fierpmádaga miellahtuide ja siiddus juohkit maiddái dieđuid oahpahussii guoskevaš áššiin. Sámi oahpaheaddjifierpmádat lea riikkaviidosaš fierpmádat mii galgá boahtit ávkin oahpaheddjiide geat oahpahit sámegillii.

-Dát fierpmádat lea álggahuvvon ovdánahttit sámi oahpahusa. Ja go nu oallugat leat searvan fierpmádahkii jagis, de orru dat čájeheame ahte oahpaheaddjit leat ohcalan dákkár gulahallan arena. Dál sávvat mii ahte ođđa nama ja ruovttusiiddu bokte olahit vel eanet sámi oahpaheddjiid ja ahte nagodit bargagoahtit ovttas ovddidan dihte sámegiela oahpahusa ja oahpaheddjiid bargodili, lohká jođiheaddji Inger Anne Gaup ja bovde áinnas ain searvat fierpmádahkii.

Gulahallanolmmoš: Jođiheaddji Inger Anne Gaup, tel: 950 72 732   e-post: iagaup@online.no